Քրեական իրավունքի դատախաղ Արարատի մարզում Ժաննա Սիմոնյանի հետ
27/06/2015
2015 թվականի հունիսի 27-ին Արարատի մարզի Արտաշատ քաղաքում, Արարատի և Վայոց Ձորի մարզերի ընդհանուր իրավասության դատարանի Արտաշատի նստավայրում անցկացվեց քրեական իրավունքի դատախաղ, որտեղ միմյանց հետ մրցեցին Արտաշատ և Մասիս քաղաքների ավագ դպրոցների սովորողների թիմերը:
Համաձայն դատարանի անդամների նշանակված գնահատականների՝ դատախաղում առաջին տեղ զբաղեցրեց Արտաշատի ավագ դպրոցի թիմը, որը մարզվել էր «Կոնցեռն-Դիալոգ» փաստաբանական գրասենյակի ավագ իրավաբան և գործընկեր փաստաբան Ժաննա Սիմոնյանի ղեկավարությամբ: Հաղթող թիմը սույն թվականի հոկտեմբեր ամսին ՀՀ Վճռաբեկ դատարանում կիսաեզրափակիչում կհանդիպի դատախաղի հետագա փուլերի հաղթող թիմերից մեկի հետ:
Ըստ թիմերի անդամների, դատախաղում մասնակցությունը նրանց հնարավորություն տվեց ձեռք բերել գիտելիքներ և շփման փորձ, որը նրանք ոչ մի այլ տեղ չէին ստանա: Իրենց հերթին, կազմակերպիչները և դատարանի անդամները տպավորված էին այն փաստով, որ աշակերտները պարապմունքների կարճ ժամանակահատվածում /մոտ 3 շաբաթ/ հասցրել էին ընկալել բարդ իրավաբանական նյութը և կարողացան այն հստակ ներկայացնել:
Միջոցառումը նախաձեռնել էր «Իրավական հետազոտությունների ազգային կենտրոն» հասարակական կազմակերպությունը՝ ԵԱՀԿ երևանյան գրասենյակի նախաձեռնությամբ: Դատախաղը վարում էին Արարատի և Վայոց Ձորի մարզերի ընդհանուր իրավասության դատարանի դատավոր Ռուբիկ Մխիթարյանը, ՀՀ վճռաբեկ դատարանի քրեական գործերով պալատի նախագահի ավագ օգնական Անի Դանիելյանը և փաստաբան Կարեն Կարապետյանը: Դատախաղն ընթանում էր «Իրավական հետազոտությունների ազգային կենտրոն» հասարակական կազմակերպության փորձագետների կողմից նախապես մշակված քրեական գործի փաստական հանգամանքների շուրջ:
Օրիգինալ հրապարակումը @ National Center for Legal Researches ֆեյսբուքյան էջ