Կոնցեռն Դիալոգը շարունակում է պրակտիկաների կառավարման նոր մոդելի ներդրումը, համաձայն որի առանձին մասնագիտացված ուղղությունների ամենօրյա ղեկավարումը վստահվում է Ընկերության փորձառու ավագ իրավաբաններին՝ գործընկերների շարունակական վերահսկողությամբ։

Աշխատանքային իրավունքի պրակտիկայից հետո, որը վերջերս գլխավորեց Շուշանիկ Ստեփանյանը, նոր մոդելը կիրառվում է նաև Ընտանեկան իրավունքի պրակտիկայում։ Դրա ղեկավար է նշանակվել Սոֆյա Խառատյանը։

Այս նշանակումը ևս մեկ քայլ է նոր մոդելի նպատակին հասնելու ճանապարհին՝ խորացնել նեղ մասնագիտացումը, ավագ մասնագետների համար ստեղծել կարիերայի աճի հստակ հնարավորություններ և յուրաքանչյուր ոլորտում հաճախորդների հետ աշխատանքը վստահել այդ ոլորտի փորձառու ղեկավարին։

Փորձառություն և մասնագիտական ուղի

Սոֆյա Խառատյանը համակարգում է Կոնցեռն Դիալոգի ընտանեկան իրավունքի ոլորտի աշխատանքները։ Նա խորհրդատվություն և ներկայացուցչություն է ապահովում տեղական ու միջազգային հաճախորդների համար՝ ընտանեկան իրավունքի ամենաբարդ և հուզական առումով զգայուն հարցերում։

Նրա փորձառությունը ներառում է՝

• Ամուսնալուծության, երեխայի խնամքի, բնակության վայրի որոշման և ալիմենտի բռնագանձման վեճեր,
• Խոշոր և միջսահմանային գույքի բաժանում,
• Միջազգային ընտանեկան վեճեր, այդ թվում՝ «Երեխաների միջազգային առևանգման քաղաքացիական ասպեկտների մասին» 1980 թ. Հաագայի կոնվենցիայի շրջանակում քննվող գործեր, երեխայի հետ տեսակցության իրավունքի, ինչպես նաև օտարերկրյա դատական ակտերի ճանաչման ու կատարման հարցեր։

2019 թվականից Սոֆյան ՀՀ փաստաբանների պալատի անդամ է, իսկ 2024 թվականից՝ արտոնագրված հաշտարար։ Այս երկակի դերը նրան թույլ է տալիս յուրաքանչյուր գործում գտնել ճիշտ հավասարակշռությունը՝ վճռական պաշտպանություն դատարանում և հոգատար արտադատական լուծում, երբ դա բխում է հաճախորդի շահերից։

Սոֆյան Chambers Global Practice Guide-ի՝ Հայաստանի ընտանեկան իրավունքին նվիրված բաժնի հեղինակն է։ Նա նաև հեղինակում է դատավարությանը, դատական ակտերի ճանաչմանն ու կատարմանը նվիրված հրապարակումներ միջազգային այլ իրավական ուղեցույցներում։

Աշխատանքային լեզուներն են հայերենը, անգլերենը և ռուսերենը։

Ընտանեկան իրավունքի պրակտիկան

Կոնցեռն Դիալոգի ընտանեկան իրավունքի պրակտիկան խորհրդատվություն է տրամադրում տեղական և միջազգային հաճախորդներին ամուսնալուծության, երեխաների խնամքի և տեսակցության իրավունքի, ալիմենտային պարտավորությունների և ամուսնական պայմանագրերի հարցերով, ինչպես նաև ներկայացնում է նրանց շահերը միջազգային ու միջսահմանային ընտանեկան վեճերում։

Այս ոլորտում իրավական լուծումը հաճախ գործի միայն մի մասն է։ Ուստի պրակտիկան առանձնանում է ոչ միայն բարձր պրոֆեսիոնալիզմով, այլև գաղտնիության խիստ պահպանմամբ և յուրաքանչյուր հաճախորդի նկատմամբ անհատական, հոգատար մոտեցմամբ։

Նշանակման մասին Ընկերության ղեկավարների դիտարկումները

Արամ Օրբելյան, Կոնցեռն Դիալոգի կառավարիչ գործընկեր

«Ընտանեկան իրավունքը պահանջում է ինչպես բարձր մասնագիտական պատրաստվածություն, այնպես էլ նուրբ մարդկային մոտեցում՝ հաճախ բավականին լարված իրավիճակներում։ Սոֆյան օժտված է այս հազվագյուտ համադրությամբ և ունի հարուստ փորձ ամենազգայուն ու միջսահմանային գործերում։

Սոֆյայի նշանակմամբ մենք հետևողականորեն շարունակում ենք նոր մոդելի ներդրումը և ևս մեկ անգամ վերահաստատում մեր հանձնառությունը՝ զարգացնել նեղ մասնագիտական ուղղությունները և դրանք վստահել իրենց գործի լավագույն մասնագետներին»։

Նարինե Բեգլարյան, Կոնցեռն Դիալոգի ավագ գործընկեր

«Սոֆյան բացառիկ պրոֆեսիոնալիզմ և հոգատարություն է ցուցաբերում մեր հաճախորդների ամենազգայուն հարցերում։ Նա ունի այն փորձառությունը, հավասարակշռված դատողությունն ու մարդկային որակները, որոնք պահանջում է ընտանեկան իրավունքը, և վստահ եմ, որ նա պատվով կգլխավորի այս պրակտիկան»։

Ընտանեկան իրավունքի պրակտիկայի ղեկավար Սոֆյա Խառատյան․ նոր դերի մասին

«Ընտանեկան իրավունքն առնչվում է մարդկանց կյանքի ամենախոցելի պահերին։ Այստեղ անհրաժեշտ են թե՛ ճշգրտություն, թե՛ կարեկցանք, հատկապես՝ բարդ և միջսահմանային գործերում։

Շնորհակալ եմ Ընկերությանը վստահության համար։ Ինձ համար մեծ պատասխանատվություն է ղեկավարել այս պրակտիկան և շարունակել լինել մեր հաճախորդների կողքին՝ նրանց համար ամենակարևոր պահերին»։